ဇီးအောင်သောခွေးမ၏လက္ခဏာများ

ခွေးချစ်သူအများစုဟာ မိမိရဲ့ခွေးမသားတင်ပြီးတဲ့နောက် ဇီးရရှိခြင်းရှိမရှိကိုသိချင်ကြလေ့ရှိပါတယ် ခွေးမတစ်ကောင်ဇီးအောင်ခြင်းရှိမရှိကို ခန့်မှန်သိရှိနိုင်တဲ့နည်းတွေနဲ့  စမ်းသပ်သိရှိနိုင်တဲ့နည်းအချို့ကိုစုစည်းဖော်ပြလိုက်ပါတယ်
(အမူအယာများပြောင်းလဲလာခြင်း)

ခွေးမတစ်ကောင်ရဲ့ ဇီးမရမီမှာရှိတဲ့ပုံမှန်အမူအယာတွေနဲ့ ဇီးအောင်လို့မြိုင်သံသရာ ရပ်ဆိုင်းသွားပြီး တဲ့နောက် ဖြစ်ပေါ်လာတဲ့အမူအယာတွေနဲ့ ပြင်ပလက္ခဏာတွေဟာ သေသေချာချာ သတိထားကြည့်ရင် မတူတာကိုတွေ့ရမှာဖြစ်ပါတယ်

လူတွေမှာလိုပဲ ခွေးမတွေဟာဇီးအောင်ပြီးရင် မနက်စောစောအချိန်မှာမအီမသာဖြစ်  လေ့ရှိပါတယ် ဒါကြောင့်မို့မနက်ခပ်စောစောအချိန်မှာ မောပမ်းလွယ်ပြီး ထုံထုံထိုင်းထိုင်း လေးလေးကန်ကန်ဖြစ်နေတတ် ပါတယ်

(နို့သီးခေါင်းများကြီးလာခြင်း)

ဇီးအောင်နေတဲ့ခွေးမရဲ့နို့သီးခေါင်းလေးတွေဟာ မသိမသာကြီးလာပြီး ဇီးမရခင်   အချိန်တုန်းကထက် ပိုပြီး ထင်ထင်ရှားရှားမြင်တွေ့လာရမှာ ဖြစ်ပါတယ် ၊ အဲဒီ    နို့သီးခေါင်းလေးတွေကိုညှစ်ကြည့်ရင် နို့ရည်လေးတွေ စိမ့်ထွက်လာတာကိုမြင်တွေ့ရ မှာဖြစ်ပါတယ်

(အာလ်ထရာဆောင်းဓာတ်မှန်ရိုက်ကြည့်ခြင်း)

ခွေးမတစ်ကောင်ဇီးအောင်ခြင်းရှိမရှိကို အစောဆုံးသိရှိနိုင်တဲ့အကောင်းဆုံးနည်း  ကတော့ အာလ်ထရာဆောင်းဓာတ်မှန်ရိုက်ကြည့်ခြင်းပဲ ဖြစ်ပါတယ် ၊ ဒီနေရာမှာ  အရေးကြီးတာက အာလ်ထရာဆောင်း ဓာတ်မှန်ရိုက်ကြည့်ခြင်းကို         သားတင် တဲ့နေ့ကစပြီး(၂၅)ရက်မြောက်တဲ့ နေ့ကျမှပြုလုပ်ဖို့သတိပြုသင့်ပါတယ်

(ကလေးတွေရဲ့နှလုံးခုန်သံကိုနားထောင်ကြည့်ခြင်း)

ဇီးအောင်ပြီးနောက်(၂၅)ရက်မြောက်ပြီးဆိုရင် ကလေးတွေဟာနှလုံးစတင်ခုန်လာပြီ ဖြစ်တဲ့အတွက် အပြင်ကနေ Pinard horn လို့ခေါ်တဲ့ကလေးနှလုံးခုန်သံကို နားထောင်တဲ့ကိရိယာနဲ့ နားထောင်ကြည့် လို့ရပါတယ် ဒါပေမယ့် ဒီနည်းက ကလေးကောင်ရေ ဘယ်လောက် ရှိတယ်ဆိုတာကိုမသိနိုင်ပါဘူး

(သွေးစစ်ကြည့်ခြင်း)

လူတွေမှာကိုယ်ဝန်ရှိမရှိကိုဆီးစစ်ကြည့်ခြင်းအားဖြင့်သိနိုင်ပေမယ့် ခွေးမတွေရဲ့ မျိုးပွားမှုဆိုင်ရာဟိုမုန်းတွေ ဟာ ဇီးရှိလာခြင်းကြောင့် ဆီးထဲမှာထူးထူးခြားခြား ပြောင်းလဲသွားခြင်းမရှိတဲ့အတွက် ခွေးတွေမှာ ဆီးစစ်ကြည့်ရုံနဲ့ဇီးရှိမရှိကို အတိအကျမသိနိုင်ပါဘူး ၊ လူတွေနဲ့မတူတာကတော့ ခွေးမတွေဟာဇီးအောင်ပြီး နောက်မှာ သူတို့ရဲ့အချင်းတိုင်ကနေ relaxin ဟိုမုန်းထွက်နေ လေ့ရှိပါတယ် ဒါကြောင့်ခွေးမတွေမှာ ဇီးရှိမရှိသိချင်ရင် သွေးထဲမှာပါဝင်နေတဲ့ relaxin ဟိုမုန်းပမာဏကိုစစ်ဆေးကြည့်လေ့ရှိပါတယ်

(လက်ဖြင့်ကိုင်တွယ်စမ်းသပ်ကြည့်ခြင်း)

ကျွမ်းကျင်ပြီးအတွေ့အကြုံရင့်ကျက်တဲ့ တိရစ္ဆာန်ရောဂါကုဆရာဝန်တွေဆိုရင်  သားတင်ပြီးရက်ပေါင်း (၂၀-၃၀)အကြာမှာ ခွေးမရဲ့အစာအိမ်ကို စမ်းသပ်ခြင်းအားဖြင့် သိရှိနိုင်ကြတယ်လို့ဆိုပါတယ်

(အိပ်စရေးဓာတ်မှန်ရိုက်ကြည့်ခြင်း)

သားအောင်ပြီးနောက်ရက်ပေါင်း(၄၅)ရက်အကြာမှာ ဇီးအောင်နေတဲ့ သားငယ်လေး တွေရဲ့အရိုးတွေကို အိပ်စရေးဓာတ်မှန်ရိုက်ကြည့်ခြင်း အားဖြင့်မြင်တွေ့ရနိုင်ပါတယ်   အိပ်စရေးဓာတ်မှန်ရိုက်ကြည့်ခြင်းရဲ့အားသာချက်တစ်ခုကတော့ ဇီးအောင်နေတဲ့   ကောင်ရေဘယ်လောက် ရှိနေတယ်ဆိုတာကိုသိရှိနိုင်ခြင်းပါပဲ ၊ ဒီလိုကြိုတင်သိရှိထား   ခြင်းအားဖြင့် တကယ်သားပေါက်လာချိန်မှာ ကောင်ရေအပြည့်မွေးမလာရင် အထဲမှာ   ကျန်နေသေးတဲ့ကောင်ရေကိုသိရှိနိုင်တဲ့အတွက် လိုအပ်တဲ့ကုသမှု ကိုအချိန်မီပြုလုပ်  ပေးနိုင်မှာဖြစ်ပါတယ် ခွေးမတွေမှာ တစ်ခါတရံ Pseudocyesis လို့ခေါ်တဲ့ အတုအယောင်ဇီးအောင်နေတဲ့ လက္ခဏာ မျိုးတွေ လည်းဖြစ်တတ်တဲ့အတွက် သင့်ရဲ့ခွေးမဟာ တကယ်ဇီးအောင်နေ ခြင်းရှိမရှိအတိအကျ သိချင်ရင်တော့ တိရစ္ဆာန်ရောဂါကုဆရာဝန်နဲ့ပြသပြီး အထက်မှာ  ဖော်ပြခဲ့တဲ့စမ်းသပ်စစ်ဆေးမှုတွေ လုပ်ကြည့်ပြီးမှသာ အတိအကျသိရှိနိုင်မှာဖြစ်ကြောင်းဖော်ပြအပ်ပါတယ်